काठमाडौं, २९ फागुन । विश्वव्यापी रुपमा फैलिँदै गएको कोरोना (कोभिड–१९) भाइरसलाई विश्व स्वास्थ्य संगठन (डब्लुएचओ)ले विश्वव्यापी महामारी घोषणा गरेको छ ।

डब्लुएचओले पत्रकार सम्मेलनमार्फत् कोरोनाको विश्वव्यापाी महामारीको घोषणा गर्दै यो भाइरसलाई हल्का र लापरबाही रुपमा नलिन आग्रह गरेको हो । संगठनका महानिर्देशक टेड्रोस एड्हानोम गेब्रायसेजले पत्रकार सम्मेलनमा भाइरसको बढ्दो प्रभावलाई लिएर विश्व चिन्तित भएको भन्दै यसको रोकथामको लागि सचेत हुन आग्रह गर्नुभएको छ । कोरोना भाइरस नियन्त्रणको लागि आक्रामक निर्णय लिन समेत सबै देशका सरकारलाई आग्रह समेत गनुभयो ।

अमेरिकाले कोरोना भाइरस (कोभिड–१९) को संक्रमण फैलनबाट रोक्न युरोपबाट अमेरिकामा गरिने सबै यात्रामा प्रतिबन्ध लगाएको छ । अमेरिकी राष्ट्रपति डोनाल्ड ट्रम्पले आजदेखि ३० दिनसम्म लागु हुने गरी युरोप–अमेरिका यात्रामा प्रतिबन्ध लगाउने घोषणा गर्नुभएको हो । यो कडा र अत्यावश्यक प्रतिबन्ध बेलायतमा भने लागु नहुने राष्ट्रपति ट्रम्पले बताउनुभएको छ ।

छिमेकी भारतले पनि विदेशबाट भारत जाने भिसामा प्रतिबन्ध लगाएको छ । भारतीय स्वास्थ्य मन्त्रालयले कोरोना भाइरसको संक्रमण रोक्नको लागि आउँदो १५ अप्रिलसम्म सबै भिसा निलम्बित गर्ने फैसला गरेको हो । प्रवासी भारतीय नागरिकलाई दिइने भिसामुक्त यात्राको सुविधामा पनि १४ अप्रिल २०२० सम्म प्रतिबन्ध लगाइएको छ । यो प्रतिबन्ध सबै विमानस्थल र बन्दरगाहमा १३ मार्च २०२० को मध्यरातदेखि लागु हुनेछ । भारतले कुटनीतिक, सरकारी, संयुक्त राष्ट्रसंघ, अन्तराष्ट्रिय संस्था, इम्प्लेइमेन्ट र प्रोजेक्ट भिसा बाहेक अन्य भिसा १५ अप्रिलसम्म निलम्बन गर्ने निर्णय गरेको हो ।

यसैबीच, भारतको उत्तरप्रदेशस्थित लखनउमा पनि कोरोना भाइरसको एक जना संक्रमित फेला परेको भारतीय संचार माध्यमले जनाएका छन् । क्यानडाबाट आफन्त भेट्न लखनउ पुगेकी महिलालाई कोरोना भाइरस पोजेटिभ देखिएको किंङ जर्ज मेडिकल विश्वविद्यालयले जनाएको छ । भारतमा संक्रमितको संख्या बुधबारसम्म ६१ रहेको छ ।

बेलायतमा चार सय ५६ जनामा कोरोना भाइरसको संक्रमण पुष्टि भएको छ भने आठ जनाले ज्यान गुमाएका छन् । अमेरिकामा अहिलेसम्म कोरोना भाइरसको संक्रमणबाट ३८ जनाको ज्यान गएको छ भने एक हजार तीन सय २२ जनामा संक्रमण भएको छ । अमेरिकी राष्ट्रपति ट्रम्पले कोरोना भाइरस विश्वभरको दुश्मन भएको भन्दै यसलाई चाँडो नियन्त्रण गर्नुपर्नेमा जोड दिनुभएको छ । युरोपको इटली, फ्रान्स, स्पेन, जर्मनी, स्वीजरल्याण्ड, नर्वे लगायतका देशमा कोरोनाको संक्रमण तीव्र बनेको छ ।