शिक्षाको पहुँच वृद्धि गर्न सके विभेद अन्त्य

2019-03-05 16:04


काठमाडौँ, २० फागुन । शिक्षाको पहुँच वृद्धि गर्नसकेमा मुलुकमा देखिएका सबै खालका विभेद अन्त्य गर्न सकिनेमा जोड दिइएको छ । 

प्रतिनिधिसभाअन्तर्गत महिला तथा सामाजिक समितिले आज प्रा डा चैतन्य मिश्रले ‘सामाजिक एवं सांस्कृतिक समावेशीकरणका मुद्दा’ मा गरेको छलफलमा सबै नागरिकमा शिक्षाको सहज पहुँच पु¥याउन सकेमा समाजका जातीय र छुवाछूतजन्य विभेद अन्त्य हुने बताउनुभयो । 

“समाजका सबै खालका विभेद अन्त्य गर्न नागरिकको समृद्धि जरुरी छ, त्यसका लागि कम्तीमा विद्यालयको आधारभूत शिक्षा गुणस्तरीय हुनुपर्छ”, प्रा डा मिश्रले भन्नुभयो, “छुवाछूतजस्ता विभेदको जड अज्ञानता हो ।” 

लोकतन्त्रले वर्गीय असमानतालाई तोड्नुपर्नेमा जोड दिँदै उहाँले कम्तीमा व्यक्ति जन्मेदेखि भोग्नुपर्ने विभेदलाई न्यूनीकरण गर्न भूमिका खेल्नुपर्ने जरुरी रहेको बताउनुभयो ।समाजका विद्वान् वर्गले जागीरे मानसिकता मात्र नराखी नयाँ तरिकाले ज्ञान निर्माणमा ध्यान दिनुपर्ने आग्रह प्रा डा मिश्रको छ । 

समितिका सदस्य दुर्गाबहादुर राउत, गङ्गा चौधरी, हीरा गुरुङ, विमला नेपालीले समाजमा विद्वान् भनिएका केही व्यक्तिले आफ्नो बौधिकताबाट समाजका नराम्रा विकृति÷विसङ्गतिलाई अन्त्य गर्नमा प्रभावकारी भूमिका नखेली अनावश्यक आलोचनामा समय बिताएको धारणा राख्नुभयो । 

समितिका सभापति निरुदेवी पालले महिला तथा सामाजिक समितिले देशमा विद्यमान कुसंस्कार र कुरीतिलाई न्यूनीकरण गरी समतामूलक समृद्ध समाज निर्माण गर्ने उद्देश्यले समितिले निरन्तर सम्बन्धित क्षेत्रका विज्ञसँग सुझाव लिएर अगाडि बढ्ने बताउनुभयो । 

समितिले यसअघि यसै विषयमा संस्कृतिविद् प्रा डा धनबहादुर कुँवरसँग छलफल गरेको थियो । 

    Comment Here!


सम्बन्धित समाचार

View All