काठमाडौं ७ माघ । गृहमन्त्री रवि लामिछानेले आफूले मिडियाको हेडलाइन बदल्न नसक्ने तर्क गरेका छन् ।

कर्तव्य ज्यान मुद्दामा फरार सांसदकै अघिपछि लागेको आरोप लागिरहेका बेला गृहमन्त्री लामिछानेले पुराना समातिने मात्र नभइ धेरै नयाँहरू फरार हुन नपाउन् भन्ने हेक्का राखेको भन्दै सामजिक सञ्जाल मार्फत जबाफ फर्काउन थालेका छन् ।

माघ ५ गते रवि लामिछानेको पार्टी र राप्रपाबाट मन्त्री बनेकाहरु डोलप्रसाद अर्याल र विक्रम पाण्डेका बारेमा कान्तिपुर दैनिकले व्यान हेडलाइनमा समाचार छापेको थियो । त्यसो त रवि लामिछाने, डोलप्रसाद अर्याल र विक्रम पाण्डेको स्वार्थ बाझिने गरी भएको मन्त्री नियुक्ति र उनीहरुले गरेको बदमासीका बारेमा नेपाली मिडियामा लगातार समाचार तथा रिपोर्टहरु सार्वजनिक भइरहेका छन् ।

आफूले हिजो बोलेका शब्दशब्दको हेक्का रहेको भन्दै गृहमन्त्री लामिछानेले लेखेका छन्, ‘पुराना ‘फरार’हरु समातिन्छ्न मात्र होइन धेरै नयाँहरु फरार हुन नपाउन् भन्ने कुराको हेक्का छ ।’

उनले भोट माग्दा गरेका वाचाहरू नबिर्सिएको बताएँदै जनताको जीवन बदल्न मेहनत गरिरहेको बताएका छन् । ‘धुलो धेरै छ, पुरानो छ । थोरै पर्खिनु चाहिँ पर्छ ’ उनले सामाजिक सञ्जालमा लेखेका छन् ।

कर्तव्य ज्यान मुद्दामा फरार भएका महोत्तरी –१ बाट निर्वाचित सांसद लक्ष्मी महतो कोइरीको विषयमा प्रतिनिधि सभामै सांसदले गृहमन्त्री लामिछानेसँग जवाफ मागेका थिए ।

संसदमा सबै कुरा प्रक्रिया अनुसार हुने बताएका गृहमन्त्री लामिछानेले शुक्रबार सांसद महतोलाई पक्राउ गर्न प्रहरी प्रधान कार्यालयलाई निर्देशन दिएका थिए ।
उनले लेखेका छन् ।

‘पुराना”फरार”हरु समातिन्छ्न मात्र होइन धेरै नयाँहरु फरार हुन नपाउन् भन्ने कुराको हेक्का छ।हिजो बोलेका शब्द शब्दको हेक्का छ,भोट माग्दा गरेका वाचाहरुको हेक्का छ।मिडियाको हेडलाईन म बदल्न सक्दिन तर जनताको लाइफलाईन बदल्न मेहनत गर्दैछु।धुलो धेरै छ, पुरानो छ.. थोरै पर्खिनु चाहिँ पर्छ!!’