ह्वाइट हाउसले ६ वटा मुस्लिम बाहुल्य देशका नागरिकहरु र सबै शरणार्थीहरुका लागि भिसा आवेदनसम्बन्धि नयाँ मापदण्ड बनाएको छ । नयाँ मापदण्ड अनुशार उनीहरुले अमेरिका आउनका लागि अमेरिकामा नजिकको ब्यापारिक वा पारिवारिक सम्बन्ध देखाउनुपर्नेछ । नयाँ नियमले इरान, लिबिया, सिरिया, सोमालिया, सुडान र यमनका नागरिकहरु लगायत सबै शरणार्थीलाई प्रभाव पार्नेछ ।

अमेरिकी राष्ट्रपति डोनाल्ड ट्रम्पको यात्रा प्रतिबन्धबारेको आदेश कार्यान्वयनमा सर्बोच्च अदालतले अनुमति दिएपनि ह्वाइटहाउसले अदालतको आदेश अनुशार भिसाका नयाँ मापदण्ड तय गरेको हो । नयाँ नियम अनुशार अमेरिकामा पारिवारिक वा ब्यापारिक प्रकारको नजिकको सम्बन्ध नहुने ६ देशका नागरिकले ९० दिनसम्म अमेरिकाको यात्रा गर्न पाउने छैनन् ।

अमेरिकी सरकारले बुधबार नै भिसाका लागि अमेरिकी दूतावास र कन्सुलेटहरुमा भिसाको नयाँ गाइडलाइन पठाइसकेको छ । जसअन्तरगत भिसा आवेदकले भिसा प्राप्त गर्नका लागि बुबाआमा, दम्पत्ति, छोराछोरी, ज्वाई, बुहारी वा दाजुभाईदिनीबहिनी अमेरिकामा रहेको प्रमाणित गर्न सक्नुपर्नेछ । तर मंगेतर, हजुरबा हजुरआमा, नातीनातिना, अन्टी, अंकल, भजित, भान्जाभान्जी, भिनाजु, भाउजु, काकाकाकीका छोराछोरी जस्ता सम्बन्ध भएकाहरुलाई भने अमेरिका छिर्न दिइनेछैन ।