जाजरकोट ,७ साउन । सोमबार बिहानको अबिरल बर्षाले जिल्ला सदरमुकाम खलंगाको सडक अबरुद्ध भएको छ । पहिरोले सडक भत्काएपछि जिल्ला सदरमुकाम खलंगामा मोटरसाईकल बाहेक अन्य कुनै पनि सवारी साधन चल्न सकिरहेका छैनन् ।

यातायातका साधनहरु चल्न नसकेपछि यात्रुहरु पैदल हिड्न बाध्य भएका छन् ।
शान्तिचौतारा बसपार्क नजिकै रहेको खहरेकोलामा मोटरसाईकलनै आवत–जावत गर्न नसक्ने गरि सोमबार बिहानको पानीले सडक भत्किएको जिल्ला प्रहरी कार्यालय जाजरकोटले जनाएको छ ।

त्यसैगरि जिल्ला प्रहरी कार्यालयले दिएको जानकारी अनुसार जिल्ला सदरमुकाम खलंगाको मुख्य बजारका रुपमा रहेको ठाँटी नजिकको सडक भत्किएपछि मोटरसाईकल बाहेकका अन्य कुनै पनि सवारी साधन चल्न नसक्ने अबस्था भएको छ । त्यसैगरि खलंगा–पाँचकाटिया सडक पनि पुरै अबरुद्ध भएको छ ।

गाउँबाट सदरमुकाम आउने र सदरमुकामबाट बाहिर जाने यात्रुहरु पैदल हिड्न बाध्य भएका छन् । जाजरकोट देखि काठमाण्डौं लागि आझै यात्रा तय गरेका नेपाल पत्रकार महासंघ, जाजरकोटका अध्यक्ष भीमबहादुर सिंहले आफ्नो यात्रा स्थगित गरेको बताएका छन् ।

बर्षादको समयमा हुने सडक अबरुद्धलाई खोल्नका लागि भेरी नगरपालिकाले बिपद ब्यबस्थापन कोषवाट २ लाख २६ हजार भुक्तानी दिनेगरि ३ महिनाको लागि स्क्यावेटर भाँडामा लिएको छ । तीन महिनाको लागि भाँडामा लिएको स्क्यावेटरको समयबधी एक महिना बितिसकेको भेरी नगरपालिकाका प्रमुख प्रशासकीय अधिकृत डिल्लीराज बेलबासेले जानकारी दिनुभयो ।

एक महिनाको समयमा उक्त स्क्यावेटरले वडा नं.१ को कालेगाउँ, २ को रिसाङ–तातोपानी, ४ को फुलवारी, कारागार रोड, ५ र ६ को बोहरा, छिप्रेना नेटीबजार रोड र वडा नं. ८, ९ र १० को भुर–स्याउली रोडमा माथिवाट आएको सलाईट फाल्ने काम गरेको प्रमुख प्रशासकीय अधिकृत बेलबासेले बताउनुभयो ।

जिल्ला सदरमुकाम खलंगा र खलंगा–पाँचकाटिया सडकलाई सडक डिभिजन कार्यालय रुकुम चौरजहारीले हेरिरहेको हुदा उक्त सडकको भत्किएका संरचना नगरपालिकाको बिपद ब्यबस्थापन कोषवाट बन्न नसक्ने नगरपालिकाका प्राविधिकहरुको भनाई रहेको छ । अबरुद्ध सडकहरुलाई तत्काल सुचारु गर्नलाई सडक डिभिजन कार्यालय रुकुम चौरजहारीले नै गर्नु पर्ने सदरमुकामबासीले माग राखिरहेका छन् ।