झापा,७ साउन । करिब एक करोड लागतमा सञ्चालनमा आएको झापाको भद्रपुरस्थित पशु बधशाला प्रयोग विहिन हुने अवस्थामा पुगेको छ ।

भद्रपुर नगरपालिकाले पशु बधशालाको आन्तरिक व्यवस्थापनमा खासै चासो नदेखाउँदा सरकारको एक करोड रुपैयाँ बराबरको लगानी खेर जाने स्थितिमा पुगेको छ, भने चोक चोकमा माछामासु पसल खोल्ने क्रम समेत बढेर गएको छ ।

भद्रपुर नगरपालिका कार्यालयको स्वामित्वमा रहेको भद्रपुर ५ स्थित बसपार्क छेऊमा सञ्चालनमा ल्याएको पशु बधशाला प्रयोग विहिन अवस्थामा पुगेको छ । नगरका अव्यवस्थित माछा मासु पसलहरुलाई व्यवस्थितसँगै एकद्धार प्रणालीबाट स्वच्छ तथा सफा माछामासु बिक्री वितरण गराउने उदेश्यका साथ नगरपालिकाले ठूलो लगानीमा पशु बधशालामा निर्माण गरेको हो ।

तर, अहिले पशु बधशालामा रहेको १० वटा सटर (पसल) मध्ये अहिले चार वटा पसल मात्र सञ्चालनमा छ । बधशाला भित्र पसल भाडामा लिएर बसेका व्यवसायी अहिले बधशाला छाडेर नगरको चोक-चोकमा पसल थापेर माछामासु बिक्रीवितरण गरिरहेका छन् । यसरी सडक तथा बजार क्षेत्रमा जथाभावी माछामासु पसल खोल्ने क्रम बढेपछि नगरमा दुर्गन्ध फैलिनुका साथै उपभोक्ताले स्वच्छ तथा सफा माछामासु खानबाट समेत बञ्चित हुनु परेको छ ।

पशु बधशालामा भित्रै सञ्चालित बिजय मासु पसलका सञ्चालक विजय साहका अनुसार जथाभावी चोक-चोकमा माछामासु पसल खोल्ने व्यवसायीलाई नगरपालिकाले कानुन बमोजिम कारवाही गर्न नसक्दा पशु बधशाला प्रयोग विहिन बन्ने अवस्थामा पुगिसकेको बताउनुभयो ।

नगरपालिकाको १९ कठ्ठा जग्गामा निर्माण गरिएको बधशालामा १ करोड १ लाख ३२ हजार ३ सय ४० रुपैया खर्च भएको छ । २०६७ चैतमा कृषि तथा सहकारी मन्त्रालय अन्तरगत पशुपंक्षीबजार प्रवद्र्धनबाट ३८ लाख, तत्कालीन स्थानीय विकास मन्त्रलायको जगेडा कोषबाट ४६ लाखलाख र नगरपालिकाको आन्तरिक स्रोतबाट १५ लाख गरी १ करोड १ लाख ३२ हजार ३ सय ४० रुपैया बधशालाको निर्माण गरिएको हो ।

बधशाला निर्माण कार्य सुरुदेखि नै विवादित बनेको थियो । पहिलो चरणको निर्माण कार्य उपभोक्ता समिति मार्फत गराएपनि दोस्रो चरणको कार्य टेण्डर प्रक्रिया मार्फत नगरपालिकाले गराएको थियो ।

२०७० असारमा सञ्चालन आउनुपर्ने बधशाला तीन बर्षअघि मात्र सञ्चालनमा आएको थियो । नगरपालिकाले बधशाला उद्घाटन नगरी सञ्चालन ल्याएको छ । कृषि तथा सहकारी मन्त्रालय अन्तरगत पशुपंक्षीबजार प्रवद्र्धनमार्फत जिल्ला पशुसेवा कार्यालय झापाले बधशालालाई व्यवस्थित बनाउन तीन बर्षअघि ३० लाख रुपैयाँ थप बजेट छुट्टयाएको थियो ।

तर, नगरपालिकाले ३० लाख रकम लिन अस्विकार गर्दा आएको बजेट समेत फिर्ता गएको थियो । नगरपालिकाले वेवस्ता गर्दा करोडको भौतिक संमरचना खेर जाने अवस्था पुगिसकेको माछा व्यवासयी राजु रायले बताउनुभयो ।

यता भद्रपुर नगरपालिका प्रमुख जीवनकुमार श्रेष्ठका अनुसार पशु वधशाला र माछामासु बिक्री केन्द्र फरक भएको प्रतिक्रिया दिनुभयो। भद्रपुर बधशाला नभएर माछामासु बिक्री गर्ने ढाँचाको रुपमा भवन बनाइएकोले यसलाई बिक्रीकेन्द्रको रुपमा विस्तार गर्न आवश्यक रहेको उहाँले बताउनुभयो ।

जथाभावी पसल थापेर माछा मासु बिक्री वितरण गर्ने व्यवसायीलाई नगरपालिकाले कानुनी दायर भित्र ल्याउनु पर्छ । जतात्यतै खोलिएका व्यवसायीलाई एक द्धार प्रणालीमा नल्याएसम्म उपभोक्ताले स्वच्छ र सफा माछामासु उपभोग गर्न नपाउनुका साथै करोड लागतमा निर्मित पशु बधशाला प्रयोगमा आउन सक्दैन । त्यसैले यसतर्फ नगरपालिका कडा रुपमा प्रस्तुत भएर अगाडी बढनु पर्ने आवश्यकता देखिन्छ ।