रुकुमपूर्व । जनआन्दोलन २०६२/६३ पछि नेपालमा सम्पन्न भएका सबै संसदीय चुनावमा निरन्तर संसदमा प्रवेश गर्ने पार्टी प्रमुखका रूपमा नेकपा संयोजक प्रचण्ड स्थापित भएका छन्। २०८२ सालको प्रतिनिधिसभा निर्वाचनमा पनि उनले विजय हासिल गर्दै चुनाव जित्ने पहिलो पार्टी प्रमुख बन्ने उपलब्धि कायम गरेका छन्।

नेकपाका संयोजक प्रचण्ड १० हजार २४० मतसहित विजयी भएका हुन्। उनका प्रतिस्पर्धी एमाले लीलामणि गौतम ३ हजार ४६२ मत मात्रै पाए। कांग्रेसकी कुसुमदेवी थापाले ३ हजार ८१ मत पाएकी छन्।

रुकुमपूर्वबाट उम्मेदवारी दिएका प्रचण्ड प्रारम्भिक मतपरिणामअनुसार आफ्ना प्रतिस्पर्धीहरूलाई पछि पार्दै अग्रस्थानमा पुगेका छन्।

२०६२/६३ को जनआन्दोलनपछि भएको पहिलो संविधानसभा निर्वाचन २०६४ मा प्रचण्ड रोल्पा र काठमाडौं दुवै क्षेत्रबाट विजयी भएका थिए। त्यसपछि २०७० सालको दोस्रो संविधानसभा निर्वाचनमा उनले काठमाडौं–१० र सर्लाहीबाट उम्मेदवारी दिएका थिए। काठमाडौं–१० मा पराजित भए पनि सिराहाबाट उनले जित हासिल गर्दै संसद प्रवेशलाई निरन्तरता दिएका थिए।

२०७४ सालको प्रतिनिधिसभा निर्वाचनमा प्रचण्ड चितवनबाट विजयी भएका थिए भने २०७९ सालको निर्वाचनमा गोरखा पुगेर पनि उनले जित हात पारेका थिए। विभिन्न चुनावमा निर्वाचन क्षेत्र परिवर्तन गरे पनि संसदमा उपस्थित हुने उनको श्रृंखला भने निरन्तर कायम रह्यो।

यस क्रममा प्रचण्डले राजनीतिक गठबन्धनहरू परिवर्तन गर्दै आएका छन्। सत्ता समीकरणमा उतारचढाव भए पनि उनी भने प्रत्येक चुनावपछि संसदमा उपस्थित हुने प्रमुख नेतामध्ये एक बनेका छन्।

यसपटकको निर्वाचनमा भने उनी रुकुमपूर्वबाट उठेर पुनः विजयको नजिक पुगेका छन्। प्रारम्भिक परिणामअनुसार उनी २०८२ सालको प्रतिनिधिसभा निर्वाचनमा जित घोषित हुने पहिलो पार्टी प्रमुख बन्ने अवस्थामा पुगेका छन्।

उता प्रमुख प्रतिस्पर्धी दलका नेताहरू भने मतगणनामा पछि परिरहेका छन्। नेपाली कांग्रेसका सभापति तथा नेकपा (एमाले) का अध्यक्ष निर्वाचन क्षेत्रमा प्रारम्भिक मतपरिणाममा पछाडि परेको विवरण सार्वजनिक भइरहेको छ।

राजनीतिक विश्लेषकहरूका अनुसार प्रचण्डको लगातार संसदमा उपस्थित रहने यात्राले नेपालको संक्रमणकालीन राजनीतिमा उनको प्रभाव र रणनीतिक अनुकूलन क्षमतालाई देखाउने उदाहरण बनेको छ।