काठमाडौं /वाशिङ्टन । अमेरिकी राष्ट्रपति डोनाल्ड ट्रम्पले अमेरिका र इजरायलले इरानविरुद्ध सुरु गरेको संयुक्त सैन्य कारबाही चारदेखि पाँच हप्तासम्म जारी रहन सक्ने बताएका छन्। आक्रमण सुरु भएको तीन दिनपछि अमेरिकी प्रशासनले आक्रमण अभियान दीर्घकालीन हुन सक्ने संकेत दिएको हो।

अमेरिकी रक्षा मन्त्री पिट हेगसेथले पत्रकार सम्मेलनमा अमेरिका युद्ध सुरु गर्ने पक्ष नभएको दाबी गर्दै राष्ट्रपति ट्रम्पको नेतृत्वमा अभियानलाई “समाप्त गर्ने चरणमा पुर्‍याइने” बताएका छन्। उनले यो ‘सरकार परिवर्तन’ को उद्देश्यसहितको युद्ध नभएको स्पष्ट पारे।

हेगसेथका अनुसार अमेरिकाको मुख्य लक्ष्य इरानको सैन्य क्षमता कमजोर बनाउनु र उसको आणविक कार्यक्रम अन्त्य गर्नु हो। उनले “अन्त्य नहुने युद्ध” सुरु गरिएको भन्ने आलोचनालाई अस्वीकार गरे। यद्यपि, कारबाही कति समयसम्म चल्ने भन्ने औपचारिक समयसीमा तोकिएको छैन। आवश्यक परे स्थलसेना परिचालन गर्ने विकल्प पनि नकारिएको छैन।

यसैबीच द्वन्द्व क्षेत्र लेबनानसम्म विस्तार भएको छ। हिजबुल्लाहले इजरायलमाथि रकेट तथा ड्रोन आक्रमण गरेपछि इजरायली सेनाले बेरुतस्थित समूहको मुख्य आधार क्षेत्रमा प्रहार गरेको जनाएको छ। इजरायलका अनुसार हतियार भण्डारण केन्द्र र अन्य सैन्य पूर्वाधारलाई लक्षित गरिएको छ।

क्षेत्रीय तनाव तीव्र बन्दै जाँदा मध्यपूर्वमा थप अस्थिरता फैलिने चिन्ता बढेको छ।