काठमाडौँ, २७ माघ : नेपाली कम्युनिष्ट पार्टीले आगामी प्रतिनिधिसभा निर्वाचन २०८२ लाई लक्षित गर्दै संक्षिप्त प्रतिबद्धता पत्र सार्वजनिक गरेको छ । आर्थिक सुधारको नयाँ चरणलाई विशेष प्राथमिकतामा राखिएको उक्त प्रतिबद्धता आज पार्टी केन्द्रीय कार्यालय पेरिसडाँडामा आयोजित विशेष कार्यक्रममा सार्वजनिक गरिएको हो ।

कार्यक्रममा पार्टी संयोजक पुष्पकमल दाहाल ‘प्रचण्ड’ले निर्वाचनका लागि तयार पारिएको संक्षिप्त प्रतिबद्धता पत्र सार्वजनिक गर्दै पार्टीले अबको राजनीतिक यात्रामा आर्थिक रूपान्तरण, सामाजिक न्याय र सुशासनलाई केन्द्रमा राखेर अघि बढ्ने स्पष्ट गर्नुभयो ।

प्रतिबद्धता पत्रमा भाषिक विभेदको अन्त्य गर्दै “सयौँ फूलहरू फुल्न दिऔँ” भन्ने अवधारणालाई आत्मसात् गरिएको छ । साथै आत्मनिर्भर राष्ट्रिय अर्थतन्त्रको विकास, स्थानीय तह र समुदायबाटै समाजवादको अभ्यास, तथा नेपाली विशेषताको समाजवादलाई सामाजिक क्रान्तिको मूल बाटोका रूपमा अघि सारिएको छ ।

यसैगरी, लोकतान्त्रिक शासन प्रणालीको आधारका रूपमा जनताको घरदैलोसम्म गुणस्तरीय सेवा प्रवाह सुनिश्चित गर्ने प्रतिबद्धता व्यक्त गरिएको छ । आर्थिक विकास र समृद्धिका आधारका रूपमा सुशासन, पारदर्शिता र मितव्ययितालाई विशेष महत्व दिइएको छ ।

शिक्षा र स्वास्थ्य क्षेत्रमा गुणस्तरीय पूर्वाधार निर्माण, उद्यमशीलता प्रवर्द्धन, उद्यमी परिवारको विकास तथा गाउँ–सहरका प्रत्येक घरमा रोजगारी सिर्जना गर्ने लक्ष्यसमेत प्रतिबद्धता पत्रमा उल्लेख गरिएको छ ।

पार्टी नेतृत्वका अनुसार उक्त प्रतिबद्धता पत्र आगामी निर्वाचनमा जनतासामु प्रस्तुत गरिने राजनीतिक, आर्थिक र सामाजिक एजेन्डाको संक्षिप्त रूप हो, जसले देशलाई समाजवाद उन्मुख समृद्धिको दिशामा अघि बढाउने मार्गचित्र प्रस्तुत गर्दछ ।

आगामी निर्वाचनका लागि प्रतिवद्धतापत्र सार्वजनिक गर्ने पहिलो दल बनेको छ । अन्य दलहरुले अझैसम्म घोषणापत्र सार्वजनिक गरेका छैनन् ।