काठमाडौं, २७ फागुन । तीनबुँदे मागसहित कैलाली जिल्ला कारागारमा ६ दिनदेखि अनसनरत प्रतिनिधिसभा सदस्य रेशमलाल चौधरीको स्वास्थ्य अवस्था बिग्रिएपछि थप उपचारका लागि काठमाडौं रेफर गरिएको छ।

सेती अञ्चल अस्पतालले चौधरीलाई रेफर गर्नुपर्ने व्यहोराको कागज बनाएपछि उनलाई काठमाडौं ल्याउने तयारी अघि बढेको कैलालीका प्रहरी प्रवक्ता सागर बोहोराले बताए। बोहोराका अनुसार आजै हवाईजहाज मार्फत उनलाई काठमाडौं ल्याईदैछ।

अञ्चल अस्पतालमा थप उपचार सम्भव नभएको र सुविधासम्पन अस्पतालमा पठाउन आवश्यक रहेको व्यहोराको पत्र अस्पताले प्रशासनमा बुझाएको थियो।

शुक्रबार सेती अञ्चल अस्पतालमा आधा घन्टा उपचार गरेर पुनः कारागार फर्काइएका चौधरीको स्वास्थ्य अवस्थामा शनिबार पनि खराबी देखिएको थियो। शनिबार अस्पतालले उपचार सम्भव नभएको भन्दै रेफर लेखेर कागजपत्र थमाएको छ।

गत फागुन २० गतेदेखि चौधरीसहित २४ जना कारागारभित्रै अनसनमा छन्। टीकापुर घटनालगत्तै प्रहरीले पक्राउ परी पुर्पक्षका लागि थुनामा रहेका चौधरी लगायतले विभिन्न माग राख्दै अनसन जारी राखेका हुन्। अनसनमा बसेका सबै बन्दी टीकापुर काण्डका आरोपित हुन्।

उनीहरुले प्रतिनिधिसभामा विजयी चौधरीलाई निर्वाचित भएको प्रमाणपत्र दिइनुपर्ने, संसदमा शपथ खान पाउनुपर्ने, टीकापुर घटनाका आरोपी २६ जनालाई क्षतिपूर्तिसहित रिहा गर्नुपर्ने र थरुहट संघर्ष समितिले राखेका माग पूरा गर्नुपर्ने लगायतका माग अघि सारेका छन्।