काठमाडौँ २५ पुस । सरकारले पुस २७ गते पृथ्वीजयन्तीका दिन सार्वजनिक बिदा दिने भएको छ । मन्त्रिपरिषद्‍को सोमबार साँझ बसेको बैठकले उक्त निर्णय गरेको हो ।

पुस २७ मा पृथ्वीजयन्तीका अवसरमा सार्वजनिक बिदाको माग गर्दै राप्रपाले सरकारलाई विश्वासको मत दिने सर्त राखेको थियो । राप्रपाको उक्त प्रस्तावमा अन्य दलहरू पनि सहमत भएका हुन् ।यसवाहेक सोमबारको मन्त्रिपरिषद्‍ बैठकले साझा न्यूनतम कार्यक्रमलाई अनुमोदन गरेको छ ।

एमाले उपाध्यक्ष तथा उपप्रधानमन्त्री विष्णु पौडेल नेतृत्वको कार्यदलले तयार पारेको साझा न्यूनतम कार्यक्रमको मस्यौदामा नेपालको भौगोलिक एकीकरणको ऐतिहासिकतालाई स्मरण र सम्मान गर्दै पृथ्वीजयन्तीका दिन पुस २७ मा सार्वजनिक बिदा दिने प्रस्ताव थियो। तर सोमबार सार्वजनिक साझा न्यूनतम कार्यक्रमको प्रतिवेदनमा उक्त विषय समेटिएको छैन ।
देउवा–दाहाल दुई हप्तापछि भेट
प्रधानमन्त्री पुष्पकमल दाहाल कांग्रेस सभापति शेरबहादुर देउवालाई भेट्न धुम्बाराही पुगेका छन् । मंगलबार विश्वासको मत लिनुअघि प्रधानमन्त्री दाहाल धुम्बाराहीस्थित देउवाको अस्थायी निवास पुगेका हुन् । बूढानीलकण्ठस्थित निवास मर्मतसम्भार भइरहेकाले देउवा धुम्बाराहीमा भाडाको घरमा बस्दै आएका हुन् ।

प्रधानमन्त्री दाहालले कांग्रेस सभापति शेरबहादुर देउवासँग आफूलाई विश्वासको मत दिन आग्रह गर्न धुम्बाराही गएको बताइएको छ । कांग्रेसले सरकारलाई विश्वासको मत दिनेरनदिनेबारे मंगलबार निर्णय गर्ने भएको छ ।