पोखरा २३ पुस । नेकपाएमाले नेता तथा पूर्वगृहमन्त्री खगराज अधिकारी गण्डकी प्रदेशका मुख्यमन्त्री नियुक्त भएका छन् । सत्तारुढ गठबन्धनको आइतबार बसेका बैठकले अधिकारीलाई मुख्यमन्त्री बनाउने सहमति जुटेसँगै प्रदेश प्रमुख पृथ्वीमान गुरुङसमक्ष मुख्यमन्त्री पदको दावी पेस गरेका हुन् । कास्की क्षेत्र नम्बर १ (१) बाट प्रदेशसभामा निर्वाचित भएका अधिकारी संघमा स्वास्थ्य मन्त्री र गृहमन्त्री भइसकेका छन् । प्रदेश प्रमुख गुरुङले पुस २१ गते ५ दिनको समय दिएर संविधानको धारा १६८ को उपधारा (२) बमोजिम मुख्यमन्त्रीको दावी गर्न आह्वान गरेका थिए । ६० सदस्यीय गण्डकी प्रदेशसभामा सरकार बनाउन ३१ सदस्य आवश्यक पर्छ ।

अधिकारी ३३ सांसदको समर्थन लिएर दावी पेस गर्न गएका हुन् । गण्डकीमा एमालेसँग २२, माओवादीको ८ सिट छ । केन्द्रीय गठबन्धनमा सामेल भएको राष्ट्रिय प्रजातन्त्र पाटी राप्रपाको गण्डकीमा २ सिट छ । अधिकारीलाई एकीकृत समाजवादीमा प्रवेश गरेका दीपक मनाङेले पनि समर्थन गरेका छन् ।

अधिकारीको राजनीतिक यात्रा

११ वर्षकै उमेरदेखि राजनीतिमा लागेका अधिकारी पहिलो पटक २०७० सालमा सुशील कोइराला नेतृत्वको सरकारमा स्वास्थ्य मन्त्री बनेका थिए। २०७४ को चुनावपछि प्रतिनिधि सभामा एमाले संसदीय दलको प्रमुख सचेतक बनेका अधिकारी १३ दिने गृहमन्त्री पनि हुन्।

एमाले अध्यक्ष केपी शर्मा ओलीले दोस्रो पटक संसद विघटन गरेपछि उनलाई २०७८ जेठ २७ मा गृहमन्त्री नियुक्त गरेका थिए।

संसद विघटनपश्चात मन्त्रिपरिषद विस्तारका विरूद्ध परेको रिटमा सुनुवाई गर्दै सर्वोच्च अदालतले १३ दिनमै उनीसहित अन्य मन्त्रीलाई पदमुक्त गरिदिएको थियो।

२०४८ सालदेखि प्रतिनिधि सभा सदस्यमा चुनाव लडेका अधिकारी ३ पटक हार बेहोरेका थिए भने २ पटक जितेका थिए।

११ वर्षकै उमेरमा पोखरा–३१ को आनन्दज्योति माविको स्वतन्त्र विद्यार्थी युनियनको सभापति बनेका अधिकारी २०३३ सालमा नेकपा पुष्पलाल समूहको सदस्य बनेका थिए।

२०३६ सालमा अनेरास्ववियुको कास्की जिल्ला अध्यक्ष बने। त्यसपछि २०४० र २०४१ सालमा पृथ्वीनारायण क्याम्पस पोखराको स्ववियु सभापति जिते।

२०३८ सालमा अनेरास्ववियुका केन्द्रिय सदस्य बनेका अधिकारी त्यसको २ वर्षपछि उपाध्यक्ष बने। अर्धभुमिगत रूपमा पञ्चायत विरुद्ध आन्दोलन गर्दा उनी २०४२ सालमा  पक्राउ परे। पक्राउ परेपछि उनलाई कास्की, तनहुँ, रौतहटलगायतका जेलमा पठाइयो। प्रजातन्त्र पुनर्स्थापनापछि २०४६ सालमा मात्र उनी रिहा भएका थिए।

हाल एमालेका अध्यक्ष रहेका केपी शर्मा ओली नेतृत्वमा गठन भएको प्रजातान्त्रिक राष्ट्रिय युवा संघमा अधिकारी केन्द्रिय सदस्य बने। त्यसपछि उनी अध्यक्ष ओलीका पक्षमा खरो उत्रँदै आएका छन्।

२०५१ सालको मध्यावधि निर्वाचन जितेर पहिलो पटक संसद छिरेका अधिकारीले २०५४ मा संसदीय दलको सचेतक बने। त्यसपछि लगातार चुनाव हारेका उनले २०७४ मा बाम गठबन्धनको उम्मेदवार बनेर कास्की–१ बाट प्रतिनिधि सभा चुनाव जितेका थिए।

बाल्यकालदेखि राजनीतिक यात्रा थालेका अधिकारीले गण्डकी प्रदेशको मुख्यमन्त्री बन्ने अवस्था आइस्क्दा अनेक आरोह–अवरोह पार गरेका छन्।