काठमाडौं, ९ बैशाख ।  प्रधानमन्त्री एवम् नेकपा एमाले अध्यक्ष केपी शर्मा ओली र वरिष्ठ नेता माधवकुमार नेपालबीचमा काठमाडौंको नागपोखरीस्थितको मेरियट होटलमा भएको दोस्रो भेटवार्ता सम्पन्न भएको प्रधानमन्त्रीकाआर्थिक मामिला सल्लाहकार मोतिलाल दुगडले जानकारी दिनुभयो ।

उहाँले अध्यक्ष ओली र वरिष्ठ नेता नेपालबीचको दोस्रो भेटवार्ता पनि सकारात्मक भएको जानकारी दिनुभयो । आजको वार्तामा के-के कुराकानी भयो भन्ने विस्तृत विवरण बाहिर आइसकेको छैन। आजको बैठकमा पनि नेपालले फागुन २८ गते ओ‌लीले गरेका निर्णय फिर्ता गरेर २०७५ जेठ ३ अघिको अवस्थामा फर्कनु पर्ने अडान दोहोर्‍याउनु भएको थियो ।  यसअघि पुष ५ गते प्रतिनिधिसभा विघटनपछि पार्टी अध्यक्ष ओली र नेता नेपालबीचमा तिक्तता भएकै अवस्थामा हिजो बुधबार साँझ ओली र नेपालबीचमा झण्डै ८ महिनापछि भेटवार्ता भएको थियो । नेपाल कम्युनिष्ट पार्टी स्थापनाको ७२ वर्ष पूरा हुने पूर्वसन्ध्यामा हिजो भएको ओली र नेपालबीचको भेटले सत्तारुढ नेकपा एमालेभित्र सकारात्मक तरंग पैदा गरेको थियो । आज बिहीबार पनि पाँच तारे मेरियट होटलमा ओली र नेपालबीचमा भेटवार्ता सँगसँगै पुननिर्माणको अन्तिम चरणमा पुगेको  धरहराको संयुक्त रुपमा अवलोकन भएको प्रधानमन्त्रीका प्रेस सल्लाहकार सूर्य थापाले जानकारी दिनुभएको छ ।