काठमाडौं, १४  कार्तिक  ।  प्रधानमन्त्री केपी शर्मा ओलीको आज गरिएको दोस्रोे डाईलासिस सफल भएको छ । काठमाडौंको ग्रान्डी अस्पतालमा आज दोस्रो पटक गरिएको मृर्गौंलाको डाईलासिस सफलतापूर्वक सम्पन्न भएको हो ।

यो सँगै चिकित्सकहरुले प्रधानमन्त्री ओलीलाई आजै अस्पतालबाट डिस्चार्ज गर्ने तयारी भैरहेको सत्तारुढ नेकपाका अध्यक्ष पुष्पकमल दाहाल प्रचण्डले जानकारी दिनुभयो । प्रधानमन्त्रीलाई डाईलासिस गरेपछि अस्पतालमै पुगेर भेट गर्नु भएका अध्यक्ष प्रचण्डले संचारकर्मीमाझ आज डाईलासिस गरिएको र प्रधानमन्त्रीलाई डिस्चार्ज गर्न लागिएको बताउनुभयो ।

उहाँले आफूले प्रधानमन्त्री ओलीसँग कुरा गरेको र अवस्था सामान्य रहेको पनि जानकारी दिनुभयो । प्रधानमन्त्री ओलीले दाहालसँग आफ्नो स्वास्थ्यमा छिटो छिटो समस्या देखा परेको पनि बताउनु भएको थियो ।

अध्यक्ष प्रचण्डलाई प्रधानमन्त्री ओलीको फेरी डाइलासिस गर्नुपर्ने, नपर्ने भन्ने कुरा भने भोली, पर्सिको अवस्थालाई हेरेर मात्रै भन्न सकिने चिकित्सकहरुले बताएका थिए । प्रधानमन्त्री ओलीले हिजो ग्राण्डी अस्पतालमा पुगेर मृर्गौंलाको पहिलो डाईलासिस गराउनुभएको थियो ।

यता प्रधानमन्त्रीकी निजी चिकित्सक प्रा.डा. दिव्यासिंह शाह र अस्पतालका मेडिकल डाइरेक्टर चक्रराज पाण्डेले प्रधानमन्त्रीको स्वास्थ्य अवस्था सामान्य रहेको जानकारी दिनुभयो । डा. पाण्डेले पत्रकार सम्मेलन गरी आजै उहालाई डिस्चार्ज गर्ने निर्णय भएको जानकारी दिनुभयो । चिकित्सकले डिस्चार्ज दिएपछि उहा केहीबेरमा ग्राण्डी अस्पतालबाट सिधै प्रधानमन्त्री निवास बालुवाटार जाने बताईएको छ ।