काठमाडौं, ६ कात्तिक । आपसी हित तथा व्यापारको विषयमा नेपाल र बंगलादेश दुई देशको प्राविधिक समितीको चौथो बैठक राजधानीमा दुई दिनसम्म चल्नेछ । बैठकमा विगतमा भएका समझदारीहरुलाई अन्तिम रुप दिइने साथै नयाँ योजनाहरुमा सहमति गरिने मन्त्रालयको प्राविधिक समितीले जनाएको छ ।

नेपाल र बङ्गलादेशसंगको व्यापार घाटा न्यूनीकरण गर्ने २३ वटा विषयमा काटमाडौंमा विस्तृतमा छलफल भइरहेको उद्योग, वाणिज्य तथा आपूर्ति मन्त्रालयले जनाएको छ । बंगलादेशसँग विद्युत व्यापार, विद्यार्थीका लागि भिसा सहजीकरण, कार्र्गो बोक्ने सवारी साधन, बन्दरगाह प्रयोग, धागो निकासी लगायत २३ विषयमा चलिरहेको छ । वार्तामा नेपालका तर्फबाट उद्योग, वाणिज्य तथा आपूर्ती मन्त्रालयका सहसचिव नवराज ढकालको नेतृत्वमा १५ जनाको टोली र बंगलादेशको तर्फबाट सहसचिवकै नेतृत्वमा सात सदस्यीय टोली रहेका छन् । नेपाल र बङ्गलादेशबीच व्यापार अभिवृद्धिमा टेवा पु¥याउने उद्देश्यले दुई देशबीच वाणिज्य सहसचिवस्तरीय प्राविधिक समितिको चौथो बैठक जारी रहेको आपूर्ती मन्त्रालयका सहसचिव नवराज ढकालले बताए । बैठकमा बङ्गलादेशसँगको व्यापार घाटा न्यूनीकरण गर्ने विषयमा पनि विस्तृतमा छलफल हुने ढकालको भनाई छ ।

काठमाडौँदेखि ढाकासम्म सिधा बससेवा सञ्चालनका बारेमा पनि बैठकमा छलफल भएको छ । निकै ठूलो संख्यामा नेपाली विद्यार्थीले बङ्गलादेशमा अध्ययन गरिरहेका छन् । सिधा बस सेवा सञ्चालनसँगै नेपाली विद्यार्थीलाई आवतजावतमा सुविधा पुग्ने बताइएको छ । यसैगरी नेपाल–बङ्गलादेश ‘कार्गो’ ढुवानीका बारेमा पनि छलफल हुने सहसचिव ढकालले जानकारी दिनुभयो । नेपाली विद्यार्थीलाई बङ्गलादेशको सहज प्रवेशाज्ञा दिलाउने विषयमा पनि छलफल हुनेछ । सहसचिव ढकालले जलमार्गमार्फत नेपाल र बङ्गलादेशलाई जोड्ने विषयमा पनि घनिभूत छलफल भईरहेको बताएका छन् ।

नेपालको पूर्वी भागबाट बङ्गलादेशमा हवाई सेवा सञ्चालन गर्ने गरी ‘एयर रुट’ का बारेमा पनि प्राविधिक समितीमा छलफल भईरहेको छ । वार्ताका क्रममा केही विषयलाई अन्तिम रुप दिई द्विपक्षीय समझदारी (एओयू) को मस्यौदालाई अन्तिम रुप दिइने तयारी भैरहेको समितीले जनाएको छ । बंगलादेशसँग सन् १९७६ मा चार वटा बन्दरगाह प्रयोग गर्न पाउने गरी सम्झौंता भएको थियो । हाल नेपालले फुलबारी बन्दगाह मात्र प्रयोग गर्न पाएको छ । अन्य बन्दरगाह प्रयोग सहज छैन । बंगलादेश र नेपाल दुबै विकासील राष्ट्र भएकोले स्वदेशी उद्योग संरक्षणका लागि विभिन्न सेफगार्ड उपाय अबलम्बन गरिरहेका छन् । वार्ता टोलीका बंगलादेशका प्रतिनिधी शारिफा खानले पनि नेपाल र बंगलादेशबीचमा हुन सक्ने व्यापारसम्बन्धित गतिविधिलाई सहकार्य गरी अगाडी बढ्नुपर्नेमा जोड दिएकी छिन् ।

प्राविधिक समितिले अन्तिमरुप दिएको एमओयूमाथि नेपाल–बङ्गलादेशबीचको उच्च राजनीतिक तहमा हस्ताक्षर हुने बताइएको छ । बैठक मङ्गलबारसम्म चल्नेछ । दुईदेश बीचको आर्थिक तथा व्यापारिक गतिविधिलाई आपसी हितमा केन्द्रित रहि सहमति हुनु फलदायी नै हुने विश्वास गरिएको छ ।