काठमाडौं, २७ असोज । चालु आर्थिक वर्षको पहिलो दुई महिनामा वस्तु आयात घटेको छ भने निर्यात व्यापार उल्लेख्य बढेको छ ।

भन्सार विभागको तथ्यांकअनुसार दुई महिना (साउन–भदौ) मा कूल २ खर्ब २९ अर्ब ५० करोड रुपैयाँ बराबरको आयात भएको छ । यो रकम अघिल्लो आर्थिक वर्ष २०७५/७६ को सोही अवधिको तुलनामा १।२२ प्रतिशतले कम हो । अघिल्लो आर्थिक वर्षमा २ खर्ब ३२ अर्ब ३४ करोड रुपैयाँ बराबरको वस्तु आयात भएको थियो ।

यस अवधिमा निर्यात व्यापारमा भने उल्लेख्य वृद्धि भएको छ । तथ्यांक अनुसार चालु आवको दुई महिनामा १८ अर्ब ५० करोड १८ लाख रुपैयाँ बराबरको वस्तु निर्यात भएको छ । यो रकम अघिल्लो आवको सोही अवधिको तुलनामा २५.८७ प्रतिशतले बढी हो । उक्त आवको दुई महिनामा १४ अर्ब ६९ करोड ९० लाख रुपैया बराबरको वस्तु निर्यात भएको तथ्यांक रहेको छ ।

तथ्यांक अनुसार आर्थिक वर्षको पहिलो दुई महिनामा नेपालको व्यापार घाटासमेत सच्चिन थालेको संकेत देखिएको छ । यस अवधिमा कूल व्यापार घाटा २ खर्ब ११ अर्ब १८ लाख रुपैयाँ बराबरको रहेको छ ।

नेपालको कूल ११६ भन्दा बढी देशसँग वैदेशिक व्यापार रहेको छ । त्यसमध्ये सबैभन्दा ठूलो हिस्सा भारत र चीनसँग रहेको छ । चालु आवको पहिलो दुई महिनामा भारतबाट १ खर्ब ४३ अर्ब २३ करोड रुपैयाँ बराबरका सामान भित्रँदा भारततर्फ १२ अर्ब १५ करोड रुपैयाँ बराबरको सामान निर्यात भएको छ ।

चीनबाट ४० अर्ब ५६ करोड ३७ लाख रुपैयाँ बराबरको सामान आयात भएको छ भने २९ करोड ४ लाख रुपैयाँ बराबरको वस्तु मात्र निर्यात भएको छ । चालु आवको पहिलो महिनाबाटै आयात घट्ने र निर्यात बढ्ने क्रम शुरु भएको हो ।