टोकियो, २६ असोज । भारी वर्षा सहितको शक्तिशाली आधि (सुपर-ताईफुन)का कारण जापानमा ज्यान गुमाउनेको संख्या १८ पुगेको छ । हागिबिस नाम दिईएको ताईफुनले १३ जना बेपत्ता भएकाे र १४९जना बढी घाईते भएकाे जापानी टेलिभिजन एनएचकेले जनाएको छ । ९० हजार नेपाली रहेको जापानमा सबै नेपाली सुरक्षित रहेकाे टोकियो स्थित दुतावासले जनाएको छ ।
आईतबार दिउसो २ बजे सम्म सबै नेपाली सुरक्षित रहेको नेपाली दुताबासका उपनियोग प्रमुख कृष्ण चन्द्र अर्यालले जानकारी दिनुभयो । एबिसी न्युजसंग टेलिफोनमा कुरा गर्दै उपनियोग प्रमुख अर्यालले संम्भावित क्षेत्रका नेपाली अगुवा र आधिकारीक निकायसंग सम्पर्क भईरहेको र अहिले सम्म सबै नेपाली सुरक्षित रहेको बताउनुभयो ।
६० वर्ष यताकै शक्तीशाली मानिएको ताईफुनले ठूलो धनजनको समेत क्षती पुर्याएको छ । ताइफुसँगै आएको भारी वर्षाले नदीहरुमा पानीको बहाव बढेसँगै टोकियो लगायत जापानका कयौं स्थानमा आवासीय क्षेत्रहरु डुबानमा समेत परेका छन् । कतै विद्युत खानेपानी आपुर्ती पनि बन्द भएको छ । चिकुमा नदीको किनार भत्किदा मध्य जापानको शहर नागानो सबै भन्दा धेरै प्रभावित भएको छ ।
नदीको पानी आवासिय क्षेत्रमा पसेको र त्यहाँको केही स्थान भने बाढीको पानीले ५ मिटरसम्म डुबेको भु–मन्त्रालयको अनुमान छ । जापानको मुख्य टापु होन्शुमा ६० लाख मानिसहरुलाई सो स्थान छाडेर सुरक्षित स्थानमा जान सुझाव दिइएको छ । त्यस्तै अर्को क्षति पुर्याएको इचिहारा, चिबा प्रान्तका केही स्थानमा १२ घरहरु क्षतविक्षत भएका छन् भने ७० भन्दा धेरै घरमा क्षति पुगेको छ ।
केही प्रिफेक्चरहरुमा घरहरु उडाएका छन् । प्रभावित क्षेत्रहरु मध्य, पूर्वी र उत्तरपश्चिममा उद्धार कार्य भइरहेकोले क्षतीको पुरै विवरण भने आईसकेको छैन । जापानको राजधानी टोकियो , सहित चिवा, गुन्मा, सैतामा, कानागावा, यामानशी, नागानो र शिजुओकालाई उच्च जोखिमको क्षेत्र मानिएको थियो ।
प्रतिक्रिया दिनुहोस्