काठमाडौं, २३ असोज । चिनियाँ राष्ट्रपती सि जिनपिङको राजकिय भ्रमणको पूर्वसन्ध्यामा प्रधानमन्त्री केपी शर्मा ओलीले पूर्व प्रधानमान्त्री, पूर्व परराष्ट्रमन्त्री एवं आर्थिक र परराष्ट्र मामिलाका जानकारसँग छलफल गर्नुभएको छ ।

छलफलमा सरकारको तर्फबाट उक्त भ्रमणका लागि हालसम्म भएको तयारीबारे जानकारी दिइएको थियो । छलफलमा सहभागी नेता एवं विज्ञहरुले लामो समयपछि चिनियाँ राष्ट्रपतिस्तरबाट हुन लागेको भ्रमणलाई ऐतिहासिक र सफल हुने अपेक्षा व्यक्त गर्दै मुलुकको हित र आवश्यकतालाई ध्यान दिएर सन्धि, सम्झौता गर्न सुझाव दिएका थिए ।

सुझाव ग्रहणपछि प्रधानमन्त्री ओलीले नेपाल र चीनबीच लामो समयदेखि असल, प्रगाढ र छिमेकीको सम्बन्ध रही आएकाले यस भ्रमणले आपसी सम्बन्धलाई थप उचाईमा पु-याउने विश्वास व्यक्त गर्नुभएको छलफलमा सहभागी नेकपाका प्रवक्ता नारायणकाजी श्रेष्ठले जानकारी दिनुभयो ।

प्रवक्ता श्रेष्ठले नेपालको राष्ट्रिय हितलाई केन्द्रमा राखेर चीनसँग आर्थिक साझेदारीका विषयमा छलफल हुने बताउँदै केरुङ–काठमाडौँ रेलमार्ग निमार्णको लगानीको ढाँचाबारेसमेत छलफल गरिने उल्लेख गर्नुभयो । प्रधानमन्त्री ओलीले भ्रमणको क्रममा दीर्घकालीन हित र आवश्यकताका विषयमा छलफल गर्ने साथै तत्कालीन आवश्यकता र सहकार्यलाई पनि उत्तिकै महत्व दिइने बताउनुभयो ।

यस अवसरमा पूर्व प्रधानमन्त्री तथा विज्ञहरुले विश्व अर्थतन्त्रमा शक्तिशाली बन्दै गएको छिमेकी मुलुकसँग हामिले निकै सर–सहयोग लिन सकिने बताउँदै भ्रमणलाई ऐतिहासिक अवसरको रुपमा ग्रहण गरेर दुई मुलुकको सम्बन्धलाई अझ सुदृढ पार्न विश्वासको वातावरण बनाउनुपर्नेमा जोड दिनुभएको थियो ।

प्रधानमन्त्री ओलीले विदेश मामिलामा नेपालको नीतिमा अहिले सबैभन्दा स्पष्टता भएको पनि वताउनु भयो । विदेश तथा छिमेक मामिला सम्बन्धि नीतिमा नेपालले सन्तुलनका तीन आधार तय गरेर अघि बढेको प्रधानमन्त्रीको भनाइ छ । राष्ट्रिय हित, सम्बन्धको न्यायोचितता र अन्तर्राष्ट्रिय विश्वसनीयता परराष्ट्र मामिलाको सन्तुलनका आधार रहेको भन्दै प्रधानमन्त्री ओलीले सरकार विदेश नीतिमा स्पष्ट रहेको प्रष्ट पार्नुभयो ।