पाल्पा, २० असोज । दशैंको नवौं दिन महानवमीको दिन पाल्पाको भैरवस्थान मन्दिरमा ३० हजार बढी दर्शनार्थीले दर्शन गरेका छन् ।

महाअष्टमी र महानवमीको अवसरमा हिजो र आज यस मन्दिरमा वर्षदिनकै सबैभन्दा बढी भीड लाग्ने गरेको मन्दिर व्यवस्थापन समितिले जनाएको छ । मन्दिरमा बोका, हाँस, कुखुरा, पाडा लगायत २ हजार बढी बली दिइएको छ ।

बिहानैदेखि भैरवस्थानमा थामी नसक्नु भीड लागेको थियो । मन्दिरमा भीड व्यवस्थापन गर्न प्रहरी, व्यवस्थापन समिति, स्थानीय नागरिक खटिएका थिए । मन्दिर व्यवस्थापन समितिले अत्यधिक भीड भएकाले पूजा पनि सोही अनुरुप छिटो छिटो गर्ने व्यवस्था मिलाएको जनाएको छ । पाल्पाको भैरवस्थानबाहेक अन्य शक्तिपीठहरुमा पनि देवीको दर्शन गर्ने, बली चढाउने, भजनकिर्तन गर्नेको घुईंचो लागेको छ ।

पाल्पाको तानसेनस्थित रणउजीरेश्वरी भगवती मन्दिर, ताँहुको रम्भादेवी, भुवनपोखरीको गोखुङ्गा, कोलडाडाको सत्यवती, भैरवस्थान मन्दिरमा श्रद्धालु भक्तजनको घुइचो लागेको छ । मुझुङ्ग, छहरा, भुवनपोखरी, खालीवन, सिलुवा, बिरकोट, गल्धा, ज्यामिरे, अर्चले लगायतका गाउँका कोटघर र देवीको मन्दिरमा समेत दर्शनार्थीको घुइचो लागेको छ ।