काठमाडौं, ६ असोज  । प्रदेशसभा सदस्य रामेश्वर फुयाँलले व्यक्ति र समाज रुपान्तरणको महत्वपूर्ण माध्यमका रुपमा योगलाई जनस्तरसम्म विकास गर्न आवश्यक रहेको बताउनुभएको छ ।

पतञ्जलि योग समिति सुन्दरीजल योग शिविरको एघारौँ वार्षिकोत्सवका अवसरमा गोकर्णेश्वर नगरपालिका–१ स्थित ओख्रेनी माविमा आज आयोजित कार्यक्रममा उहाँले आर्थिक समृद्धिका लागि स्थानीय उत्पादन एवं जडीबुटीको उपयोग र विकासमा स्थानीय सरकारको सहयोगमा प्रदेश सरकारले कार्यक्रम सञ्चालन गर्ने बताउनुभयो । वडा नं २ का अध्यक्ष कृष्णबहादुर पण्डितले नगरपालिकाको नौ वटै वडामा योग र विभिन्न सामाजिक एवं आध्यात्मिक कार्य गर्न मिल्ने गरी सामुदायिक हल निर्माण गर्ने योजना रहेको जानकारी दिनुभयो । युवा पतञ्जलि योग समिति नेपालका प्रमुख ललितशङ्कर योगीले प्रत्येक व्यक्तिसम्म योग पु¥याउने समितिको अभियानमा सहयोग गर्न आग्रह गर्नुभयो ।

प्रा डा ऋषिराम पोखरेलले पूर्वीय निधिका रुपमा रहेको योगको महत्वलाई पछिल्लो समय पश्चिमा मुलुकले समेत आत्मसात् गर्नु योग भूमि नेपालका लागि गर्वको विषय भएको बताउनुभयो । योग समिति प्रदेश नं ३ का सल्लाहकार अच्युत अर्यालले योगको ज्ञान र अभ्यासका साथै आचरण महत्वपूर्ण रहेको उल्लेख गर्नुभयो । समितिका काठमाडौंँ अध्यक्ष सुरेन्द्र रिमालले काठमाडौँमा मात्र पतञ्जलिका १६० भन्दा बढी शिविर दैनिक सञ्चालनमा रहेका बताउनुभयो । कतिपय स्थानमा भौतिक पूर्वाधारको अभावका कारण शिविर नियमित हुन नसकेकाले पूर्वाधार निर्माणमा प्रदेश र स्थानीय सरकारले सहयोग गर्नुपर्ने उहाँको भनाइ थियो । त्यस अवसरमा एभोगार्ड, अमलालगायतका जडीबुटी रोपण गर्नाका साथै सुन्दरीजल शिविरका साधक शङ्करमान तामाङ, सुनमाया श्रेष्ठ, सुलोचना श्रेष्ठ, सरस्वती श्रेष्ठ र विजयालक्ष्मी श्रेष्ठ लगायतलाई सम्मानसमेत गरिएको थियो ।