काठमाडौं, ९ भदौ ।   जनकपुर अंचल आयुर्वेद औषधालयका कार्यालय प्रमुख डा. सिमा झाकै मिलेमतोमा व्यापक अनियमितता भएको पाइएको छ । औषधालयमा आर्थिक वर्ष २०७५/०७६ मा औषधी सहित कार्यालय प्रयोजनका लागि खरिद गरेको सामानमा समेत व्यापक चलखेल भएको हो ।

समाजिक विकास मन्त्रालयले औषधालयलाई सुविधा सम्पन्न बनाउन ससर्त अनुदान अन्तर्गत प्रदान गरेको ५० लाख, ५ लाख ९२ हजार र तीन लाख ६१ हजार गरी ५९ लाख ५३ हजार रकम मध्ये कार्यालय व्यवस्थापन, फर्निचर, मेसिनरी उपकरण लगायत शिर्षकमा समान खरिद नगरी बजेट सिध्याएको छ ।

स्पतालको फर्निचर खरिदका लागि मन्त्रालयले ५ लाख, मेसिनरी उपकरणमा ५ लाख, प्रयोगशाला व्यवस्थापनका लागि ४ लाख ५० हजार, स्थास्थ्य जीवनशैलीका लागि ३ लाख, बिरामी सुताउने बेडका लागि २ लाख, क्षारसुत्र व्यवस्थपनका लागि ३५ लाख र युएसजी मेसिनकालािग १९ लाख रकम निकासा गरिएको थियो ।

तर निकासा गरिएको कतिपय बजेट कार्यालयले कामै नगरी भ्रष्टाचार गरेको तथ्य फेला परेको हो । गत वर्षसम्म औषधालय जनकपुरधाम उपमहानगरपालिकाको अधिनमा रहँदा आएको बजेट कामै नगरी सकिउको थियो । उपमहानगरपालिका र औषधालय कार्यालय प्रमुख कार्यालय सञ्चालन एवं व्यवस्थापनका लागि २ लाख ५६ हजार रुपैयाँ केही काम नगरी भ्रष्टाचार गरेको कर्मचारी बताउ“छन् ।

उपमहानगरपालिकाले फर्निचर खरिदका लागि दुईपटक ९९ हजार ४ सय ४० र ४० हजार बजेट दिएको थियो । तर, यो रकम बराबरको कुनै पनि फर्निचर कार्यालयमा नआएको कर्मचारीहरु नै बताउँछन् । फर्निचर खरिदको नाममा उपमहानगरपालिका –८ मा रहेको जय मां लक्ष्मी फर्निचर उद्योगलाई दिए पनि हालसम्म उक्त रकमको फर्निचर कार्यालयमका आएको छैन ।

फर्निचर खरिद शीर्षकमा प्रदेश सरकारका सामाजिक विकास मन्त्रालयलेसमेत पाँच लाख रकम उपलब्ध गराएको थियो । मन्त्रालयले उपलब्ध गराएको ५ लाख रकमबाट मात्र दुई वटा सोफा खरिद गरिएको छ । यस्तै, प्राकृतिक जडिबुटि औषधि उपभोगलाई बिलको भुक्तानी स्वरुप ४९ हजार ९ सय २० रुपैयाँ भुक्तानी दिइएको छ । तर, कार्यालयले खर्च गरेको बजेट अनुसारले कार्यालयमा समाननै छैन ।

औषधालयका प्रमुख डा. सिमा झाका श्रीमान सरोज राय यादवले संचालन गरेको औषधि पसलबाट नै अस्पतालले विभिन्न मितिमा औषधिहरु खरिद गरेको छ ।

अस्पतालले औषधि खरिदका लागि निकालेको कोटेशनमा उनले आफनो श्रीमानलाई नै औषधि खरिदको लागि कोटेशन दिएकी छन् । जनकपुर ४ राहत आयुर्वेद फर्माबाट कोटेशनमा औषधि खरिद गरेको कार्यालयको तथ्यांकले देखाए पनि उक्त पसल कतै पनि भेटिदैन । तर, विभिन्न मितिमा त्यही फर्माबाट कोटेशनमा औषधि खरिद गरेको कार्यालयले उपलब्ध गराएको कागजातमा उल्लेख छ ।