काठमाडौं,५ साउन । उपप्रधान एवं रक्षामन्त्री ईश्वर पोखरेलले संसदमा प्रतिपक्षद्वारा विधेयक टेबुल गर्न नदिनु अधिनायकवाद भएको टिप्पणी गर्नुभएको छ ।

शनिबार बिराटनगर बिमानस्थलमा संचारकर्मीसंग कुरा गर्दे पोखरेलले पूर्ववर्ती सरकारले ल्याएको चिकित्सा शिक्षा विधेयक जस्ताको तेस्तै ल्याउनुपर्ने माग अनुचित भएको बताउँदै संसद्मा प्रतिपक्षद्वारा विधेयक टेबुल गर्न नदिनु अधिनायकवाद भएको बताउनुभएको हो ।

उपप्रधानमन्त्री पोखरेलले स्वास्थ्य विधेयक संसद्मा छलफल भई यसमा भएका समस्या समाधान हुनुपर्नेमा जोड दिँदै जननिर्वाचित संसद्मा विधेयकका बुँदामा आवश्यक संशोधन प्रस्ताव राखी छलफल प्रकियाबाट विधेयकमा रहेका विवाद टुंग्याउनुपर्ने धारणा पनि राख्नुभयो ।

उहाले चिकित्सा शिक्षा सुधारका नाममा अनशन बसेर डाक्टर गोविन्द केसीले गलत अभ्यास गरेको आरोप पनि लगाउनुभयो । उपप्रधानमन्त्री पोखरेलले डाक्टर केसी राजनीतिक स्वार्थ समूहको शिकार बन्ने खतरा बढेको भन्दै त्यसबाट जोगाउन जरुरी रहेको उल्लेख गर्नुभयो ।

त्यस्तै उहाले डाक्टर केसीको माग पूरा गर्ने काम जनताबाट निर्वाचित जनप्रतिनिधिको भएकाले केसीले वार्तामा बस्न आनाकानी गर्न नहुने तर्क गर्नुभयो ।