काठमाडौं, २७ वैशाख । पूर्वप्रधानमन्त्री एवं नयां शक्ति पार्टीका संयोजक डा. बाबुराम भट्टराईले भौतिक पुर्वाधार र सामाजिक पुर्वाधार विकासका विषयलाई मुख्य प्राथमिकतामा राख्न सरकारको ध्यानाकर्षण गराउनुभएको छ ।

विहिबारको प्रतिनिधिसभा बैठकको सुरुमै समय लिएर बोल्दै डा. भट्टराईले भौतिक पुर्वाधार र सामाजिक पुर्वाधारका विषयलाई प्राथमिकता दिन सुझाव दिनुभएको हो । आगामी बजेटको प्राथमिकता र वित्तिय संरचनाको कुरा गर्दा समाजवादको ठुला कुरा गरेर नभई भौतिक र सामाजिक पुर्वाधार तयार गर्नुपर्नेमा उहाँले जोड दिनुभयो ।

पुर्व पश्चिम सडक , रेल मार्ग, जल मार्ग, हवाई मार्ग लगायत कुरालाई पहिलो प्राथमिकतामा राख्नुपर्ने उहाँको तर्क थियो । सामाजिक पुर्वाधार विना औद्योगिक अर्थतन्त्र नबन्ने भन्दै उहाँले शिक्षामा क्रान्ति ल्याउनुपर्ने बताउनुभयो । अहिलेको शिक्षा प्रणालीलाई परिर्वतन गरेर प्राविधिक बनाउनुपर्ने तर्क उहाँले गर्नुभयो । सबै प्रदेशमा विशेष आर्थिक क्षेत्र घोषणा गर्न पनि उहाँले माग गर्नुभयो ।

उहाँले कृषिको आधुनिकीकरणका लागि सिंचाईको उपयुक्त व्यवस्था गरि बैज्ञानिक बाली प्रणाली अपनाउनुपर्नेमा जोड दिनुभयो ।

पर्यटनलाई प्राथमिता दिदै रोजगारीको अवसर श्रृजनाको लागि तुलनात्मक लाभको क्षेत्र पहिचान गरि उद्योग विकास गर्न आवश्यक बजेटको व्यवस्था गर्नुपर्ने बताउनुभयो । उहाँले अनुत्पादक क्षेत्रको लगानी घटाउन सरकारलाई सुझाव दिनुभयो । उहाँले बैदेशिक लगानी भित्र्याउन लगानी बोर्डलाई सशक्त र कामकाजी बनाउनुपर्ने आवश्यकता औल्याउनुभयो ।

उहाँले सबैलाई खुसी पार्ने प्रयत्न भन्दा पनि प्राथमिकताको निर्धारणमा ध्यान केन्द्रित गर्नुपर्ने पर्नेमा उहाँले अर्थमन्त्रीको ध्यानाकर्षण गराउनुभयो । उहाँले भुमि व्यवस्थापनमा विशेष ध्यान पुर्याउन सरकारलाई सुझाव दिनुभयो ।

सामान्य निरन्तरतामा मात्रै बजेटको सिद्धान्त र प्राथमिकता निर्धारण गरे विकासको गति पहिल्याउन नसक्ने भन्दै उहाँले समाजवाद उन्मुख बजेट विनियोजन गर्नुपर्नेमा जोड दिनुभयो ।

उहाँले दुवै छिमेकी मुलुकसंग मित्रवत सम्बन्ध कायम राखेर लगानी भित्र्याउन पनि सरकारलाई सुझाव दिनुभयो ।

भ्र्रष्टाचार निवारण गर्ने निकाय नै भ्रष्टाचारमा लागेको देखिएको उल्लेख गर्दे उहाँले भ्रष्टाचार निवारणमा आमुल परिर्वतन गर्न प्रधानमन्त्रीलाई सुझाव दिनुभयो ।