काठमाडौँ, १८ फागुन । अमेरिकाको ४५ औं राष्ट्रपति बनेका डोनाल्ड ट्रम्प पदभार ग्रहण गरेयता आफ्नो बोली र एक्सनको कारण बारम्बार विवादमा तानिएका छन् । सून्य सहनशीलता अपनाउने राष्ट्रपति ट्रम्प आफ्नो आलोचकलाई तुरुन्तै कटु जवाफ फर्काउन माहिर छन् । एक अनलाईनले उदृत गरेको उनको बानीहरु सम्बन्धि तथ्यहरु रमाईला र रोचक छन् ।

१। ह्वाइट हाउसमा राखिएको टेलिभिजनको रिमोट ट्रम्पले अरुलाई छुन दिँदैनन् । ६० इन्च स्क्रिन भएको टेलिभिजनमा उनले चाहेको च्यानलमात्रै लाग्छ । ट्रम्पले टेलिभिजनमा आफूलाइृ मनपर्ने कार्यक्रम तथा समाचार नियालिरहेका हुन्छन् । न्युयोर्क टाइम्सका अनुसार टेलिभिजनको रिमोट अरूले छोएको ट्रम्पलाई मन पर्दैन । उनको अपेक्षा तोडेर कसैले छुने दुस्साहस पनि गर्दैन । ट्रम्प र उनका प्राविधिक सहयोगी कर्मचारीबाहेक अरूले रिमोट छुँदैनन् । टेलिभिजन सेटमा ट्रम्पलाई मन पर्ने च्यानल मात्रै निश्चित गरिएका छन्, जस्तैः फक्स न्युज । कुनै छलफल चलिरहेका वेला पनि उनको आडैमा रहेको टेलिभिजन सेट बन्द हुँदैन । केबल म्युट गरिएको टेलिभिजनमा दौडिरहेका स्क्रोलिङ हेडलाइनमा ट्रम्प नजर पुर्याइरहेका हुन्छन् । ट्रम्पलाई समाचार हेर्नैपर्छ । उनी न्यूज एडिक्टेड नै छन् । ट्रम्पले हरेक दिन चार घण्टा टेलिभिजन हेरेकै हुन्छन् । कतिपय मन पर्ने शो तोकिएको समयमा हेर्न नभ्याए रेकर्ड गरेर पछि हेर्छन् ।

२। ट्रम्पलाई कुनै न कुनै रूपमा विश्वकै चर्चित व्यक्तिका रूपमा स्थापित भइराख्न मन लाग्छ । न्युयोर्क टाइम्सका अनुसार जब उनी समाचारका हेडलाइनको केन्द्रमा पर्दैनन्, तब असहज महसुस गर्न थाल्छन् । उनका एकजना पूर्वसचेतकलाई उद्धृत गर्दै टाइम्सले लेखेको थियो– ‘दुई–तीन दिनसम्म ट्रम्प समाचारमा चर्चामा रहेनन् भने असहज महसुस गर्छन् ।’

३। ट्रम्पको हातमा स्मार्ट फोन छुट्दैन । स्मार्ट फोनसँग एकैछिन छुट्टिए भने आनन्द मान्न सक्दैनन् । समाचारमा अपडेट भइरहने उनलाई आफ्ना धेरै विचार सामाजिक सञ्जालबाट अभिव्यक्त गर्न मन लाग्छ । यसकारण पनि स्मार्टफोनविना उनी रमाउन सक्दैनन् । उनको धेरै धारणा अभिव्यक्त हुने माध्यम नै स्मार्टफोन हो ।

४। ट्रम्पको खानपान र डाइट पनि अचम्मको छ । उनलाई सबैभन्दा बढी मनपर्छ, डाइट कोक । न्युयोर्क टाइम्सका अनुसार ट्रम्प मदिरापान र धुम्रपान गर्दैनन्, तर डाइट कोकको पारखी हुन् । कफीसमेत नपिउने ट्रम्प एकै दिनमा १२ क्यानसम्म कोक पिउँछन् । उनको डेस्कमा कोकको क्यान तयारी अवस्थामा हुन्छ । ट्रम्प खानाको कुनै परिकारको सौखिन तथा धेरै चासो राख्ने व्यक्ति भने होइनन् । उनी पोटेटो चिप्सलगायत ड्राई फुड बढी खान्छन् । त्यसैले त अमेरिकी सञ्चारमाध्यमले उनलाई ‘पोटेटो म्यान’को उपनाम दिएरसमेत समाचार बनाए । खानपानकै कारण उनी रोगी भएको चर्चा पनि मिडियामा भयो । त्यसपछि केही समयअघि ह्वाइट हाउसले उनको ‘होलबडी’ जाँच नै गरायो । तर, उनी पूरै स्वस्थ रहेको रिपोर्ट आयो ।

५। ट्रम्प स्वास्थ्यप्रति सचेत छन् । हातको माध्यमबाट किटाणु संक्रमण भएर धेरै रोग लाग्ने विषयमा उनी गम्भीर छन् । त्यसैले हातको सफाइमा निकै ध्यान दिन्छन् । लिफ्ट प्रयोग गरेपछि तथा पिज्जालगायत परिकार खाएपछि तुरुन्त सेनेटाइजर प्रयोग गर्छन् । ट्रम्पले ‘द आर्ट आफ द कमब्याक’ नामको आफ्नै किताबमा भनेका छन् कि उनी सकेसम्म धेरैपटक हात सफा गरिरहने प्रयत्न गर्छन् र कुनै रोगको सिकार हुनबाट सचेत रहन्छन् ।

६। ट्रम्प नियमितजसो डिनरका लागि कोही न कोही पाहुनालाई ह्वाइट हाउसमा आमन्त्रण गर्छन् । मानसिक रूपमा बलियो बन्न सुझाब–सल्लाह दिनेहरू उनका खास पाहुना हुन्छन् । यस्ता पाहुनालाई उनले देखाउने एउटा व्यवहार भने अचम्म लाग्ने खालको छ । उनी अधिकांश पाहुनालाई बाथरुम आफैँ देखाउने गर्छन्, जुन निकै आकर्षक छ ।

७। ट्रम्प हरेक खेललाई उत्तिकै मन पराउँछन् । हाइस्कुल पढ्दा धेरै टिमको क्याप्टेनिङ गरेका थिए । उनले एकताका युएसएफएल लिगका लागि प्रोफेसनल फुटबल टिमको व्यवस्थापनसमेत गरेका थिए । तर, अहिले ट्रम्प केबल गल्फमा मात्रै केन्द्रित छन् । उनी अहिले पनि गल्फ खेल्छन् । तर, उनले एक्सरसाइजका लागि नियमति कुनै रुटिन भने बनाएका छैनन् ।

८। ट्रम्प निकै कम सुत्छन् । हरेक रात उनी केवल ५–६ घण्टा मात्रै सुत्छन् । दिउँसो सुत्ने बानी छैन । दैनिक उनी १६ घण्टासम्म काम गर्छन् ।

एजेन्सी