बागलुङ १७ जेठ । जिल्लाको अमलाचौरकी शिक्षासेवी शान्ता शर्माले विद्यार्थीहरुलाई विद्यालय पोशाक सहयोग गरेकी छन् । शर्माले बागलुङ नगरपालिका वडा नं. १२ अमलाचौरमा रहेको जनचेतना प्राथमिक विद्यालयका विद्यार्थीलाई पोशाक सहयोग गरेकी हुन् ।

विद्यालयमा अध्ययन गरिरहेका ३० जना विद्यार्थीका लागि ६० हजार रुपैयाँ बराबरको पोशाक सहयोग गरेको विद्यालयले जनाएको छ । शर्मा आँफैले बुधबार एक समारोहका बीच विद्यार्थीलाई पोशाक उपलव्ध गराएकी थिइन् । आफु जन्मेहुर्केको गाउँको विद्यालयलाई सहयोग गर्ने भन्दै उनले केही समयदेखि खाजा खर्च कटाएर रकम जम्मा गर्दै आएको बताएकी छन ।

काठमाडौंको एलआरआई विद्यालयमा कार्यरत शर्माले निजी विद्यालय हुनेखानेको र सरकारी गरिब र दलितको विद्यालय भन्ने भाष्य चिर्न राज्यले लगानी बढाउनु पर्ने बताइन् । उनले सामुदायिक विद्यालयमा पढ्ने बालबालिकालाई सबै क्षेत्रबाट हुनु पर्ने बताइन् ।
कार्यक्रममा विद्यालयका अभिभावक, राजनीतिक दलका प्रतिनिधि र स्थानीय जनप्रतिनिधि सहभागि थिए । आफुले विद्यालय पोशाक पाएकोमा विद्यार्थीहरुले खुशी ब्यक्त गर्दै आफुहरूलाई पढ्नमा थप उर्जा मिलेको प्रतिक्रिया जनाएका थिए ।