विराटनगर,१५ कात्तिक । विराटनगरको विराट नर्सिङ होममा उपचार गराउन भर्ना भएकी सुत्केरीको मृत्यु भएपछि मृतकमा आफन्तले प्रदर्शन गरेका छन् ।

सामान्य प्रसुतिमार्फत छोरा जन्माएकी सुनसरी दुहरी नगरपालिका– ८ रनी गाउँकी २० वर्षीया रमिला कार्की घिमिरेको मृत्यु भएपछि उनका आफन्तले प्रदर्शन गरेका हुन् । बिहीबार राति विरामीको मृत्यु भएपछि चिकित्सकको लापरबाहीका कारण घटना भएको भन्दै आफन्त र स्थानीयले नाराबाजी समेत गरेका थिए ।

मंगलबार विराट मेडिकल कलेज टंकीशिनवारीमा छोरा जन्माएकी रमिलाको रक्तश्राव नरोकिएपछि चिकित्सकले सोही दिन दिउँसो पाठेघर फालिदिएका थिए । तर होस नखुलेपछि बुधबार दिउँसो विराट नर्सिङहोममा ल्याएर भेण्टिलेटरमा भर्ना गरिएको थियो ।

रमिलाका श्रीमान भूपाल घिमिरेले दिउँसो ३ बजे शल्यक्रिया सफल भएको चिकित्सकले बताएता पनि विरामीको अवस्थामा सुधार नआएको बताउनुभयो । तर बुधबार बिहानसम्म होस् नआएपछि टिचिङ अस्पतालबाट विराट नर्सिङ होममा ल्याएको बताउनुभयो । मृतकका आफन्तले शल्यक्रियामा लापरबाही गर्ने चिकित्सकलाई कारबाही र घटनाको छानबिन हुनुपर्ने माग राखेका छन् ।

जन्मिएको बच्चाको पनि मुटुको धड्कन ठीक नभएको भन्दै एनआईसीयूमा राखिएको थियो तर नवजात शिशुको पनि मृत्यु भइसकेको छ । सिकारु चिकित्सकलाई शल्यक्रिया गर्ने जिम्मा दिएका कारण आफूहरुले परिवारको सदस्य र भर्खर जन्मिएको शिशु गुमाउनु परेको मृतककी काकी रिमला घिमिरेले बताउनुभयो ।

अस्पतालका सञ्चालक समेत रहेका डा ज्ञानेन्द्रमान सिंह कार्की नेत्रृत्वको चिकित्सक टोलीले शल्यक्रिया गरेको थियो तर शल्यक्रियामा कुनै लापरबाही नगरिएको विराट नर्सिङहोमका सञ्चालकसमेत रहेका चिकित्सक ज्ञानेन्द्रमानसिंह कार्कीले बताउनुभयो ।