काठमाडौं, ७  कात्तिक । निर्वाचन आयोगले मंसिर १४ गते संघ, प्रदेश र स्थानीय तहको रिक्त स्थानमा उपनिर्वाचन गर्ने निर्वाचन तालिका सार्वजनिक गरेको छ । आयोगले निर्वाचनको तयारीका लागि आवश्यकिय कामलाई तिव्रता दिएको छ । सत्तापक्ष, प्रतिपक्षका राजनीतिक दलहरु आफुले सफलता हासिल गर्ने दाबी सहित निर्वाचनको तयारीमा होमिएका छन् ।

निर्वाचन आयोगले मंसिर १४ गते उपनिर्वाचन गर्ने भएको छ । आयोगले २०७४ मंसिर १० र २१ गते दुई चरणमा प्रतिनिधि सभा, प्रदेश सभा र स्थानीय तहको चुनाव गरेको थियो । निर्वाचनपछि विविध कारणले प्रतिनिधि सभा सदस्य १, प्रदेश सभा सदस्य ३, स्थानीय तह तर्फ प्रमुख, अध्यक्ष, उपाध्यक्ष र वडा अध्यक्ष समेत ४८ गरी जम्मा ५२ पदहरु हालसम्म रिक्त अवस्थामा रहेका छन् ।

ति सबै ठाउँमा मंसिर १४ गते निर्वाचन हुने भएको हो । यसका निम्ति निर्वाचन आयोगले निर्वाचनको कार्यतालिका सार्वजनिक गरिसकेको छ भने तयारी तिव्र रुपमा अगाडी बढाएको छ । प्रतिनिधी सभातर्फ कास्की क्षेत्र नं. २, प्रदेश सभातर्फ भक्तपुर १ को (क), बाग्लुङ २ को ( ख), दाङ ३ ( ख) मा हुने निर्वाचनको निम्ति कार्तिक २१ गते उम्मेदबारले मनोनयनपत्र दर्ता गर्नुपर्ने गरी निर्वाचन आयोगले निर्वाचन कार्यतालिका प्रकाशित गरिसकेको छ ।

त्यसैगरी, स्थानीय तह तर्फ भने सुनसरी जिल्लाको धरान उपमहानगरपालिका प्रमुख, पाँचथर जिल्लाको फाल्गुनन्द गाउँपालिका, संखुवासभा जिल्लाको मकालु गाउँपालिका र महोत्तरी जिल्लाको पिपरा गाउँपालिकाको अध्यक्ष, हुम्ला जिल्लाको खार्पुनाथ गाउँपालिकाको उपाध्यक्ष र विभिन्न अन्य ३४ वटा जिल्लाका ४० वटा स्थानीय तहका विभिन्न वडा अध्यक्ष ४३ गरी ४८ वटा रिक्त पदका लागि कार्तिक २७ गते उम्मेदबारले मनोनयन दर्ता गर्ने निर्वाचन कार्यतालिका रहेको छ । निर्वाचन आयोगले निर्वाचनको तयारीका लागि काम अघि बढाईरहेको निर्वाचन आयोगका प्रवक्ता राजकुमार श्रेष्ठले जानकारी दिए ।

आफुले चुनेको जनप्रतिनिधी नहुँदा विकास निर्माणका कामले गती नलिएकोले छिट्टै निर्वाचन गर्नुपर्ने स्थानीय तहका सर्वसाधारणले गुनासो गर्दै आएका छन् । सरकारको पनि मुख्य कार्यसूचीमै रहेको उपनिर्वाचन गराउने कामले ढिलै भएपनि गति लिन लागेको छ । आयोगले उपनिर्वाचनको तयारी थालेपछि राजनीतिक दलहरु पनि निर्वाचनको तयारीमा जुट्न थालेका छन् । सत्तारुढ नेपाल कम्युनिष्ट पार्टी(नेकपा) ले आफ्नो प्रतिनिधीकै ठाउँ खाली रहेकोले आगामी निर्वाचनबाट पनि नेकपाकै प्रतिनिधि आउने दाबी गरिरहेको छ र निर्वाचनको तयारीमा जुटेको छ ।

नेकपा यता, प्रतिपक्षी नेपाली कांग्रेस लगायतका दलहरुपनि निर्वाचनमा आफुले जित्ने दाबी सहित निर्वाचन अभियानमा जुटेका छन् । केन्द्रदेखि स्थानीय तहसम्मको नेकपाको नेतृत्वबाट जनअपेक्षा पुरा हुन नसकेकोले आगामी निर्वाचनमा नेपाली कांग्रेसलाई जनताले मत दिएर जिताउने जिकिर कांग्रेसको छ ।

आफ्नो क्षेत्रको जनप्रतिनिधि नहुँदा विकास निर्माणको काममा स्वभाविक रुपमा सुस्तता आएको छ । विकास निर्माणका काममा गति दिन सर्वसाधारणको आग्रहलाई ध्यानमा राख्दै सरकारले उपनिर्वाचन गराउन लाग्नु सकारात्मक छ । निर्वाचनलाई सभ्य बनाउन सत्तापक्ष, प्रतिपक्ष सबैको उत्तिकै जिम्मेवारी हुन्छ । निर्वाचनलाई सभ्य र शान्तिपूर्ण बनाउन सम्बन्धित सबैले ध्यान पुराउनुपर्छ ।