काठमाडौं, ५ कात्तिक । राष्ट्रपति विद्यादेवी भण्डारी जापानी सम्राट नारुहितोको राजगद्दी आरोहण समारोहमा सहभागी हुनुभएको छ ।

जापानका सम्राट नारुहितोले एउटा भव्य समारोहका बीच राजगद्दी आरोहण गर्नुभएको हो । उहाका पिता अकिहितोले राजगद्दी परित्याग गरेपछि ५९ वर्षीय नारुहितो मे महिनामा जापानको सम्राट बन्नुभएको थियो । पूर्वसम्राट अकिहितो पनि आफ्नो छोराको राजगद्दी आरोहण समारोहमा उपस्थित हनुहुन्थ्यो । विभिन्न परम्परागत विधि सम्पन्न भएपछि उहाले औपचारिक रूपमा राजगद्दी आरोहण गर्नुभयो । सम्राटहरूले विशेष अवसरमा लगाउने परम्परागत वस्त्र धारण गरेर नारुहितो साढे छ मिटर अग्लो ताकामिकुरा राजगद्दीमा बस्नुभएको थियो । राजगद्दीबाट उहाले एउटा लिखित मन्तव्य वाचन गर्नुभयो ।

उहाले राष्ट्र र जनताको एकताको प्रतीकका रूपमा आफ्नो उत्तरदायित्व वहन गर्न संविधानअनुसार काम गर्ने शपथ लिएको बताउनुभयो । सो अवसरमा उहाकी पत्नी साम्राज्ञी मासाको सगै रहेको अर्को आसनमा बस्नुभयो । प्रधानमन्त्री शिन्जो आबेले सम्राटलाई बधाई ज्ञापन गर्दै सम्बोधन गर्नुभयो ।

यसपछि उहाको नेतृत्वमा उपस्थित मानिसहरूले बान्जाई अर्थात् सम्राट चिरायु रहून् भन्दै नारा लगाएका थिए ।उक्त विशेष समारोहमा जापानको राजकीय शक्तिको सङ्केतका रूपमा लिइने प्राचीन तरबार र रत्न पनि राखिएको थियो । राष्ट्रपति भण्डारी जापानी प्रधानमन्त्रीले अतिथिहरूका लागि आयोजना गरेको रात्रिभोजमा सहभागी भएर भोलि स्वदेश फर्कनुहुनेछ ।