बुटवल, ३० असोज ।
नेपाल कम्युनिष्ट पार्टी (नेकपा) का महासचिव बिष्णु पौडेलले कालिगण्डकी–तिनाउ डाईभर्सनबाट पछाडी नहटने बताउनु भएको छ ।
कालिगण्डकी–तिनाउ डाईभर्सनको लागि बिस्तृत परियोजना प्रतिवेदन (डिपिआर) निर्माणको काम भईरहेको बताउँदै महासचिव पौडेलले डिपिआर निर्माणको काम सकिएपछि स्रोतको प्रवन्ध गरेर मोडालिटि तयार गरि निर्माणको काम अंगाडी बढ्ने आश्वासन दिनुभयो ।
रुपन्देही उद्योग संघको ४१ औं वार्षिक साधारण सभा तथा २१ औं अधिवेशन उदघाटन कार्यक्रममा बोल्दै पूर्व अर्थमन्त्री समेत रहनुभएका महासचिव पौडेलले बिकास र समृद्धिको अभिभारा पुरा गर्ने काम नीजि क्षेत्रको साथ बिना सम्भव नभएको र मुलुकको अर्थतन्त्रलाई सवल बनाउनका लागि सरकारले सबै क्षेत्रलाई साथमा लिएर अंगाडी बढेको दावी गर्नुभयो ।
महासचिव पौडेलले सरकार नीजि क्षेत्रसंगै रहेको बताउँदै सरकारले चालेका कदमबाट हतोत्साही नहुन र ढुक्क भएर लगानी गरि रोजगारी अभिबृद्धि गर्न समेत नीजि क्षेत्रलाई आग्रह गर्नुभयो ।

रुपन्देही जिल्लालाई व्यबस्थित औद्योगिक क्षेत्र भएको जिल्लाको रुपमा अंगाडी बढाउन खोजिएको बताउँदै उहाँले सरकारले घोषणा गरेको मोतिपुर औद्योगिक क्षेत्रलाई आधुनिक र व्यबस्थित औद्योगिक क्षेत्र बनाईने आश्वासन दिनुभयो ।
कार्यक्रममा बोल्दै प्रदेश पाँचका भौतिक पूर्वाधार तथा यातायात मन्त्री बैजनाथ चौधरीले प्रदेशको स्थायी राजधानी नतोकिँदा बजेट कार्यान्वयनमा समस्या भएको बताउनुभयो । उहाँले प्रदेशको स्थायी राजधानी तोक्ने प्रदेश सभाको काम भएपनि प्रदेश सभा मात्रै नभएर प्रतिपक्षि दल, संघीय सरकारको समेत भुमिका हुने भएकाले प्रदेशको स्थायी राजधानी तोक्ने काममा सहजिकरणका लागि पार्टी महासचिव पौडेललाई आग्रह गर्नुभयो ।