काठमाडौं १० जेष्ठ । सत्तारुढ राष्ट्रिय स्वतन्त्र पार्टी (रास्वपा)का सभापति रवि लामिछाने भारत भ्रमणमा जाने भएका छन्। भारतको विदेश मन्त्रालयको निमन्त्रणामा उनी आगामी जुन १–२ (जेठ १८–१९) मा दिल्ली जाने तय भएको हो।

भ्रमणका क्रममा उनले भारतीय विदेशमन्त्री एस. जयशंकर लगायत उच्च अधिकारीहरूसँग भेट गर्ने कार्यक्रम तय भएको छ। साथै, भारतीय विदेश सचिव विक्रम मिश्रीसँग पनि भेटवार्ता हुने बताइएको छ।

प्रधानमन्त्री नरेन्द्र मोदी सँग भेट हुन सक्ने चर्चा भए पनि अहिलेसम्म औपचारिक रूपमा पुष्टि भएको छैन।

यस भ्रमणलाई पार्टीगत कूटनीतिक पहलका रूपमा हेरिएको छ। यसअघि नेपाली कांग्रेस र माओवादी केन्द्रका शीर्ष नेताहरूले पनि भारत भ्रमण गरिसकेका थिए।

नेपालका प्रधानमन्त्री बालेन्द्र शाह को भारत भ्रमण अनिश्चित भइरहेका बेला लामिछानेको यात्रा हुन लागेको हो। यसलाई नेपाल–भारत सम्बन्धका सन्दर्भमा चासोका साथ हेरिएको छ।

नेपालको कूटनीतिक अभ्यासमा सरकार प्रमुख र परराष्ट्र मन्त्रालयमार्फत हुने औपचारिक भ्रमणलाई सामान्य मानिँदै आए पनि पार्टी प्रमुख तहबाट हुने यस्तो उच्चस्तरीय राजनीतिक भेटवार्ताले राज्य संयन्त्रलाई बाइपास गरिएको हो कि भन्ने चर्चा सुरु भएको छ।

प्रधानमन्त्री बालेन्द्र शाह नेतृत्वको सरकारले भारतसँग औपचारिक सम्बन्ध सुधारमा ठोस प्रगति गर्न नसकेको आलोचना भइरहेका बेला, प्रमुख दलका नेताको यस्तो भ्रमणलाई कतिपयले वैकल्पिक कूटनीतिक सन्देशका रूपमा पनि व्याख्या गर्न थालेका छन्।

भारत–नेपाल सम्बन्धमा लिपुलेक नाका विवाद, कूटनीतिक नोट आदान–प्रदान र उच्चस्तरीय भ्रमण स्थगनजस्ता घटनाबीच हुने यो भ्रमणलाई “सामान्य राजनीतिक यात्रा कि रणनीतिक संकेत?” भन्ने बहस चर्किएको छ।