बेइजिङमा आजबाट सुरु भएको वृहत पुष्प मेलामा रहेको नेपाल मण्डलको राष्ट्रपति भण्डारीबाट उद्घाटन (फोटोफिचर)

2019-04-28 19:13


काठमाडौं, १५ वैशाख । राष्ट्रपति विद्यादेवी भण्डारीले चीनको बेइजिङमा आजबाट सुरु भएको वृहत पुष्प मेलामा रहेको नेपाल मण्डलको उद्घाटन गर्नुभएको छ ।
राष्ट्रपति भण्डारीले बेइजिङस्थित याङकी काउन्टीमा आयोजित पुष्प प्रदर्शनी स्थलमा रहेको नेपाल मण्डलको उद्घाटन गर्नुभएको हो । त्यस अवसरमा भण्डारीले नेपाल मण्डलमा रहेका विभिन्न वास्तुकला, मूर्तिकला समेतको पनि अवलोकन गर्नुभएको छ ।

राष्ट्रपतिलाई नेपाल मण्डलका संचालकहरुले मण्डलबारे जानकारी गराएका थिए । नेपाली कला संस्कृति समेटिएका मूर्ति, स्तुपाहरु राखिएका छन् ।

आजै सांझ बृहत पुष्प मेलाको चिनिया राष्ट्रपति सी जिङपिङले उद्घाटन गर्नुभएको छ । उद्घाटन समारोहमा राष्ट्रपति विद्यादेवी भण्डारी, पाकिस्तानका प्रधानमन्त्री इमरान खान, म्यारमारका स्टेट काउन्सिलर आङ काङ सुकी, कम्बोडियाका प्रधानमन्त्री हुन सेन लगायतका विश्व नेताहरुको उपस्थिति थियो । राष्ट्रपति सी ले पुष्प मेलाको उद्घाटन गरेलगत्तै विभिन्न देशका झांकीसहितको सांस्कृतिक कार्यक्रम देखाइएको थियो । आजबाट सुरु भएको यो पुष्प मेला ६ महिनासम्म चल्नेछ ।

यो पुष्प मेला संसारकै सबैभन्दा लामो समयसम्म चल्ने मेला भएको छ ।
यसैविच, चीन भ्रमणमा रहनुभएकी राष्ट्रपति विद्यादेवी भण्डारीले चीनको राजधानी बेइजिङको केन्द्रभागमा ऐतिहासिक तथा सांस्कृतिक सम्पदा श्वेत चैत्यको अवलोकन गर्नुभएको छ ।

नेपाली शिल्पीे अरनिकोले सिर्जना गरेको यस श्वेत चैत्य अवलोकन गर्न नेपाली बाहेक सबैले बीस चिनिया“ युआन अर्थात् तीन सय रुपैया“भन्दा बढीको टिकट काटेर प्रवेश गर्नुपर्छ ।

राष्ट्रपति विद्यादेवी भण्डारीलगायतका प्रतिनिधिमण्डललाई चीन सरकारले उच्च सम्मानसहित चैत्यमा स्वागत गरेको थियो । नेपाली पुर्खाको कौशल र नेपाल चीन मैत्रीको ऐतिहासिक धरोहरका रुपमा बेइजिङको केन्द्रमा विगत साढे सात सय वर्षदेखि श्वेत चैत्य स्थापित छ ।

श्वेत चैत्यको अगाडि नेपाली संस्था अरनिको समाजले दुई दशक अगाडि श्वेत चैत्य निर्माता अरनिकोको सालिक स्थापना गरेको छ । नेपालको बौद्ध तथा स्वयंभूसंग मिल्दोजुल्दो यो श्वेत चैत्य चीनमा सबैभन्दा अग्लो तथा ठूलो मानिन्छ । अरनिकोले बनाएका कयौं सम्पदाहरु भूकम्प लगायतका प्राकृतिक प्रकोपबाट नासिए पनि केही चैत्यहरु चीनले संरक्षण गरेर राखेको छ । बेइजिङ बाहेक वल्लो शान्षी प्रान्तको वु थाइसानमा पनि अरनिकोले बनाएको श्वेत चैत्य संरक्षित छ ।

    Comment Here!


सम्बन्धित समाचार

View All